z wida knjeza Bernda Rotha

Čehodla ma Horni Hajnk šěsć domow (z dopomnjenkow Jurja Brězana)Hdyž běch dźěćo, mjenowachmy ludźi, kotřiž w starej hajnkowni bydlachu, přeco Försterec, serbsce Hanjkec, hačrunjež wšak tak njerěkachu, dopomni so Jurij Brězan a powědaše dale, zo stawizna Hornjeho Hajnka, štož rěka telko, kaž hornje hajnistwo, hač do 14. lětstotka wróćo saha. Tu běše stara hajnkownja klóšterskich lěsow za Horni kraj, doniž njebu nowa hajnkownja při winicy w Smječkecach twarjena. Jenož lěsny běhar wosta na městnje, kotrehož dźěći přitwarichu kóždy dom, tak zo běchu kónc 19. lětstotka tři domy wobydlene. Hačrunjež přidružichu so spočatk lětstotka štwórty, wot Jurja Brězana 1966 twarjeny pjaty a wot Bosćija a Sonje Kubicec 1994 šesty dom, mjeno Horni Hajnk wosta.
Horni Hanjk namaka samo jako bydlenje mjeztym zemrěteho spisowaćela Jurja Brězana zachod do nowšich němskich a mjezynarodnych leksikonow. Wot něhdyšich domow wězo žadyn wjace njesteji. Wšitke buchu něhdy znowa natwarjene.

Geografiske srjedźišćo Budyskeho wokrjesa.

Dwurěčna gmejna Worklecy leži kaž wutrobička wosrjedź teritorija zarjadniskeho zwjazka “Při Klóšterskej wodźe ”, wobdata wot štyrjoch dalšich sobustawskich gmejnow. K dźensnišej politiskej gmejnje słušeja sydlišća Horni Hajnk, Wudwor, Nowa Wjeska, Worklecy, Smječkecy, Lěćna luga a Haty z cyłkownej płoninu 11,5 kwadratnych kilometrow. Něhdźe 1.300 wobydlerjow ma tu swoju domiznu. Wjetšina je dwurěčna: serbsko-němska. Prěni raz dokumentarisce naspomnjena bu wjes w lěće 1280 jako “Rokolewicz ”.
Worklecy běchu ródna wjes Michała Hórnika. Tutón serbski duchowny a literat słušeše k centralnym postawam serbskeho kulturneho žiwjenja w druhej połojcy 19. lětstotka. Worklečanska serbska zakładna a wyša šula nosy wot 1994 jeho mjeno. Wot wobydlerjow bu sławnemu synej wsy w lěće 1956 pomnik postajeny.
Zajimawe su stawizny a přitomnosć wjesneju dźělow Smječkecy a Lěćna luga. Ke kóncej 19. lětstotka bu pod zemju wuhlo wudobywane. Po tym, zo storčichu na mineralnu wodu a železosyrikojtu wodu, wuwichu so tu daloko přez mjezy Sakskeje znate lěkowanske a hojenske zarjadnišća.
Gmejna Worklecy poskića wopytowarjam a turistam kedźbyhódne zajimawostki. K tomu słuša předewšěm kompleks twarjenjow něhdyšeho ryćerkubła a chorownje z mjezowacym parkom we Worklecach. Worklecy su za wjetšinu wobydlerjow stareho wokrjesa Kamjenc ródna wjes byli.
Pódla knježeho domu w beuroniskim stilu natwarjena kapałka je swojeje nutřkowneje architektury dla jara znata a nimale jónkrótna.
Lubowarjo přirody budu předewšěm wot rozpřestrěwacych lěsach a hatow a wot najwjetšeho duba Hornjeje Łužicy zahorjeni.
W Smječkecach wudani so dale wopyt tamnišeje idylisce ležaceje ewangelsko-lutherskeje cyrkwje. Marienborn bě časowe skutkowanišćo “Sibirskeho jandźela ” Else Brändström.